Syndicat d'Initiative et de Tourisme de Schifflange

Léif Frënn vum Syndicat, Léif Memberen, Veräiner, Annonceuren a Matbierger,

Geet et Iech och esou wéi ons? D’Zäit verflitt esou schnell, lo si mer scho bei der Summervakanz ukomm. Mer bleiwen awer och iwwert de Summer aktiv, esou fënnt de Freiden, 30. August eise leschten Afterwork fir dës Saison statt. Wéi ëmmer fannt dir eis ab 17.00 Auer op der Gemengeplaz. Mer freeën ons Iech erëmzegesinn an e flotten Owend mateneen ze verbréngen. Bei dëser Geleeënheet wëlle mer all de Veräiner Merci soen, déi d’Relève geholl hunn an esou zesumme mat hire Memberen a Schëfflenger Matbierger e flotten Owend konnte verbréngen. Vill Veräiner feieren dëst Joer e ronne Gebuertsdag. Dës Fester soll een, wéi de Volleksmond seet, feiere wéi se falen, ech mengen dat brauch een de Schëfflenger net zweemol ze soen. De Syndicat d’Initiative et de Toursime gratuléiert hinnen, dass si a gudde wéi a schlechten Zäiten zesummegehalen hunn, fir konnte 60 Joer Veräinsliewe bei de Minettsrousen a 65 Joer beim Dëschtennis ze feieren. Dat ass awer nach net alles: Och den CA Schëffleng an de Fotoclub Schëffleng feieren hier 95 respektiv 90 Joer Veräinsliewen, och hinne gratuléiere mer fir déi staark Leeschtung. Natierlech däerf een déi sportlech Aktivitéit net vergiessen, och du goufen et super Resultater, mer soen all de Veräiner Merci fir hiren Asaz. All dat beweist ons, dass de Benevolat hei an der Gemeng Schëffleng präsent ass. De Syndicat d’Initiative et de Tourisme seet och senge Memberen a Schëfflenger Matbierger Merci, dass si ëmmer nees de Wee fanne fir bei eis ze kommen. Da komme mer nach kuerz zu eisem Comité, wéi der op der nächster Säit gesitt, presentéiere mer Iech eise Comité mat aktuelle Fotoen, merci dem Schëfflenger Fotoclub fir hier Gedold, et war net esou einfach mat eis.

Mer wënschen Iech all eng erhuelsam Summervakanz.

Äert Esther