Syndicat d'Initiative et de Tourisme de Schifflange

 Léif Annonceuren, Veräiner, Memberen, Matbierger a Frënn vum Schëfflenger Syndicat,

 

Mir stinn erëm virun engem Wanter, dee lues awer sécher ukënnt. D’Deeg gi méi kuerz, d’Loft méi

kill an d’Chrëschtmäert lueden op vill ënnerschiddlech Spezialitéiten an. Et ass an dëser kaler

Zäit, dass mär erëm mierken, wéi wichteg Zesummenhalt, Gedold an Hoffnung fir eis

Gemeinschaft sinn.

 

Och am Hierscht vun dësem Joer woare mär aktiv an hunn d’Schëfflenger Leit zesummebruet a

fir sëlleg Momenter gesuergt. De 16. Oktober hu mär déi éischte Kéier eisen traditionelle

Pattowend am Haff organiséiert; dëse woar méi wéi nëmme gutt besicht. Eise Pattowend, op

deem et ëmmer flott Gespréicher zwëschent de Leit gëtt, huet sech mëttlerweil zu engem

Pflichttermin fir eis Annonceuren, Memberen a Sympathisanten entwéckelt. De Weekend vum 22.

an 23. November huet am a virum Hal Polyvalent den Hobbymoart stattfonnt; wärend dësen zwee

Deeg hu mär de Visiteure bei äisëgen Temperaturen ënner anerem Glüapérol a Schocki

ugebueden.

 

Déi nächst Woche wäerten e bësse méi roueg ginn an awer bleiwe mer ganz aktiv a kommen bei äech

zum Beispill op är Generalversammlungen en Eventer besichen an ënnerstëtzen.

 

D’nächst Joer wäerte mer nach weider Aktivitéiten an Owender organiséiere fir äech an eis

zesummenzebréngen – well et sinn dës Momenter, déi mer an enger Welt, an déier et leider

ëmmer méi Konflikter gëtt, genéisse sollen an och mussen – dëst, well mer net wëssen, wat moar

ass.

 

Dofir ass all Geleeënheet, zesummenzekommen, ze laachen a sech géigesäiteg ze stäerken,

eng Chance, déi mer net däerfe verpassen. Et sinn net nëmmen déi grouss Gesten, mee virun

allem déi kleng Momenter, déi eng stoark Gemeinschaft ausmécht an d’Verbindungen tëschent

de Mënsche stäerken.

 

De Benevolat bréngt eis zesummen, dat solle mer wäertschätzen an déi Wäertschätzung och de

Fräiwëllegen an de Veräiner an a villen anere Strukture géigeniwwer weisen. Där drot dozou bäi,

dass d’Liewen an eiser Gemeng méi lieweg gëtt.

 

Jidderee vun Äech ass e Stéck Fundament vun

eiser Gemeinschaft, a genau dofir soll Är Aarbecht gesi, geschätzt a gefeiert ginn.

 

Äre Sam

President vum SIT Schëffleng